Інфармацыя аб тым, што ў Бабруйску плануюць знішчыць мазаіку 1968 года на старым корпусе лякарні імя Марзона, непакоіць мясцовых жыхароў. Яны запатрабавалі ад раённых уладаў паспрыяць захаванню мазаікі і запусцілі петыцыю «Спыніць знішчэнне мазаікі ў Бабруйску!»
Справа ў тым, што мазаіка, якую стварыў бабруйчанін Сямён Абрамаў, знаходзіцца ў выдатным стане, адзначаюць яны, але стары будынак лякарні вырашылі знесці.
Паколькі мазаічнае палатно не ўваходзіць у пералік гісторыка-культурных каштоўнасцей, яго збіраюцца дэмантаваць разам з будынкам. Аднак, звяртаюць увагу аўтары петыцыі, мазаіка з’яўляецца творам манументальнага мастацтва, таму на яе не распаўсюджваецца заканадаўства ў сферы аховы гісторыка-культурных каштоўнасцей.
«Просім... паспрыяць захаванню мазаікі праз рэканструкцыю, якая прадугледжвае перанос твора мастацтва на іншае месца, або ў музейныя фонды. Беларускае заканадаўства не прадугледжвае знішчэнне твораў мастацтва, бо гэта пра прамым вызначэнні з’яўляецца варварствам. Варварству не месца ў Бабруйску!» – паведамляецца ў петыцыі.
Падпісаць петыцыю пра недапушчальнасць знішчэння твора мастацтва можна тут.